Фото: «Ақ Жайық»

Құлсары қаласындағы үш көпқабатты үйдің тұрғындары ылғал басқан жертөлелерде жыландар пайда болғанына шағымданды, деп жазады «Ақ Жайық».

Аталған үйлер 2023 жылдың соңында көпбалалы отбасыларға берілген. Алайда келесі көктемде олар су тасқыны аймағында қалып, тұрғындар бірнеше ай бойы пәтерлеріне кіре алмай, қайықпен қатынауға мәжбүр болған.

Су қайтқаннан кейін жертөлелер тазартылғанымен, тұрғындардың айтуынша, ылғал толық жойылмаған.

Қазір жертөлелерде қайтадан су жиналып, тышқандар көбейген. Сасық иіс шығып, жыландар да пайда болған.

Аудандық тұрғын үй-коммуналдық шаруашылығы бөлімі жертөлелерді тазалау жұмыстары тұрғындардың өз міндеті екенін мәлімдеді. Құтқарушылар бір жыланды жойғанымен, тұрғындар оның жалғыз болмағанына алаңдап отыр.

Енді жұртшылық бұл мәселеге Атырау облысының жаңадан тағайындалған әкімі Болат Ақшолақов назар аудара ма деген үмітте.