4 қазаннан бастап Алматыда көлік жүктемесіне және тұрақ кеңістігінің қажеттілігіне қарай сараланған коммуналдық ақылы тұрақтарға жаңа тарифтер күшіне енеді. Тиісті шешім қалалық мәслихат сессиясында қолдау тапты.

Алматы қаласының жол қозғалысы және жолаушылар көлігі басқармасы атап өткендей, 2016 жылдан тариф өзгермеген.  Қазір  сағатына 100 теңге мөлшерінде. Осы он жыл ішінде қаладағы автомобильдер саны 1 миллионнан асқан. Бұл көше-жол желісі мен тұрақ кеңістігіне жүктемені едәуір арттырды.

Ұсынылған өзгерістердің негізгі міндеті-бос тұрақ орындарының болуын қамтамасыз ету және қала тұрғындары мен қонақтарына ыңғайлылықты арттыру. Бүгінгі таңда жүргізушілердің автотұрақ іздеуге көп уақыт жұмсауы сирек емес, бұл жолдарға қосымша ауыртпалық түсіреді. 

Жаңа тәртіпке сәйкес, салыстырмалы түрде төмен көліктік жүктемесі бар учаскелер үшін тариф сағатына 100 теңге деңгейінде сақталады. Тұрақ кеңістігін пайдаланудың орташа қарқындылығы бар аумақтарда құны сағатына 150 теңгені құрайды. Тұрақ орындары тапшылығы жоғары және қарқынды қозғалысы бар неғұрлым талап етілетін аймақтарда тариф сағатына 200 теңге деңгейінде белгіленетін болады.

Бұл ретте іргелес үйлердің тұрғындары үшін тұрғылықты жері бойынша автотұрақтарды тегін пайдалану мүмкіндігі сақталады. Ақылы автотұрақ аймағында тұратын үй иелері өз үйлерінің жанындағы таңдалған автотұрақта бір көлік құралын тегін қоюға арнайы рұқсат ала алады. Пайдаланушылардың жекелеген санаттары үшін қарастырылған жеңілдіктер де қолданыла береді.

Сараланған тарифтерді енгізу тұрақ орындарының айналымын арттыруға, еркін тұрақ іздеу уақытын қысқартуға, тоқтау және тұрақ ережелерін бұзу санын азайтуға, сондай-ақ қалалық тұрақ кеңістігін пайдалану тиімділігін арттыруға мүмкіндік береді деп күтілуде.