Қыркүйек айында Ақтөбе облысының Алға қаласында саяжай учаскелерін өрт шарпыды. Редакция сауалына берген жауабында сарапшылар өртке әуе электр беру желісінің электр сымдарындағы ақау себеп болуы мүмкін екенін мәлімдеді.

Алайда Алға ауданының төтенше жағдайлар бөлімінде зардап шеккен учаскелердің нақты саны мен өрттің саяжай иелеріне келтірген шығыны айтылмады.

Өткен айда Қостанай облысының Жітіқара қаласында да саяжайлар өртенді. Шенеуніктер материалдық шығын көлемі мен зардап шеккен учаскелердің санын да атамады. Дегенмен тұрғындардан өтініштер әлі де қабылданып жатқанын хабарлады.

Жітіқара ауданы әкімдігінің мәліметінше, бұл жағдайда саяжайлар табиғи өрт салдарынан зардап шеккен. Болашақта осындай төтенше жағдайлардың алдын алу үшін учаскелердің аумағы құрғақ өсімдіктер мен жанғыш қоқыстан тазартылып, қауіпті жерлерде минералдандырылған жолақтар мен өртке қарсы аралықтар жасалып жатыр.