Фото: КТК телеарнасының бейнесюжетінен алынды 

Біздің редакция «Halyq сұраныс» айдарын жалғастырады. Біз сауалдарға берілген жауаптарды түпнұсқа күйінде жариялаймыз.

Жамбыл облысының әкімдігі Жаңатас қаласындағы дауылдан кейінгі жағдайға қатысты түсініктеме берді.

Ведомство мәліметінше, Сарысу ауданында қатты жел салдарынан табиғи сипаттағы жергілікті ауқымдағы төтенше жағдай жарияланған. Елді мекенде екпінді желден барлығы 12 көпқабатты тұрғын үй зардап шеккен.

Оның ішінде төрт үйдің шатырына күрделі жөндеу қажет, ал тағы сегіз үйде ағымдағы жөндеу жұмыстары жүргізіледі.

Әкімдік кейбір шатырлар бұған дейін де қатты желдің салдарынан зақымданғанын атап өтті. Сондай-ақ, зардап шеккен үйлер қолданыстағы төтенше жағдайлар туралы заңнамаға сәйкес бюджет қаражаты есебінен толық жөнделетінін мәлімдеді.

Бұған дейін 6 ақпанда Жаңатаста қатты жел бірнеше көпқабатты үйдің шатырын ұшырып әкеткені, қалада электр жарығының өшіріліп, мектептерде сабақтардың тоқтатылғаны хабарланған еді. Зардап шеккендер жоқ.

Біз сауалды 2026 жылғы 6 ақпанда жолдадық. Жауап 2026 жылғы 13 ақпанда облыс әкімінің аппараты басшысының орынбасары Бауыржан Есеевтен алынды.

Жауапты орган – Жамбыл облысының әкімдігі. Облыс әкімі – Ербол Қарашөкеев.