Біз жол мәселесіне қатысты «ҚазАвтоЖолға» сұрау жолдап, мынадай жауап алдық.
Мемлекеттік бағдарламалар аясында республикалық маңызы бар 324 шақырым жолға күрделі жөндеу жүргізу жоспарланған. Бұл мақсатқа шамамен 71 млрд теңге қарастырылған. Жұмыстың негізгі бөлігі Ақмола, Солтүстік Қазақстан, Батыс Қазақстан, Маңғыстау және Жамбыл облыстарына тиесілі.
Сонымен қатар, биыл 2026–2028 жылдарға арналған бағдарлама шеңберінде жалпы ұзындығы 3 679 шақырымды қамтитын орташа жөндеу жобалары іске аса бастайды. Бұл кезеңге 120 млрд теңге бөлінген. Ең ауқымды жұмыстар Атырау, Ақмола, Шығыс Қазақстан және Алматы облыстарында жүргізіледі.
Компанияның мәліметінше, қазіргі таңда республикалық және халықаралық маңызы бар жолдардың шамамен 6 пайызы, яғни 1,5 мың шақырымға жуығы тозған күйде. Ең жоғары тозу деңгейі Ұлытау облысында, сондай-ақ Абай, Ақтөбе және Атырау облыстарында тіркелген.
«ҚазАвтоЖолда» қолданыстағы нормативтерге сәйкес жолдар әр бес жыл сайын жөндеуден өтуі тиіс екенін атап өтті. Алайда күтіп ұстау мен жөндеуге бөлінетін нақты қаржы жеткіліксіз. Жалпы ұзындығы шамамен 25 мың шақырымды құрайтын республикалық жолдар желісінде жыл сайын кемінде 5 мың шақырымды жөндеу қажет. Бірақ қазіргі қаржыландыру көлемі бұл деңгейді қамтамасыз етуге мүмкіндік бермейді.
Компания өкілдері республикалық жолдардың жағдайын тұрақты түрде жақсарту үшін ең алдымен күрделі жөндеуге жеткілікті қаржы бөлу қажет екенін атап өтті.
Похожие материалы
