Фото: freepik

Қазақстанда сумен жабдықтау және су бұру желілерінің жалпы ұзындығы шамамен 124 мың шақырымды құрайды. Өнеркәсіп және құрылыс министрлігінің редакциямыздың сауалына жолдаған жауабына сәйкес, су құбыры желілерінің тозу деңгейі – 39 пайыз, ал су бұру желілерінің тозуы – 55 пайыз.

Инженерлік желілердің ең жоғары тозуы Абай, Ұлытау, Шығыс Қазақстан, Қарағанды, Павлодар және Солтүстік Қазақстан облыстарында сақталып отыр.

Инфрақұрылымды жаңғырту мақсатында Үкімет ұлттық жобаны бекітті. Оның аясында 2029 жылға дейін шамамен 8 мың шақырым желіні жаңарту және жаңадан салу жоспарланған. Энергетика және коммуналдық секторға тартылатын инвестициялардың жалпы көлемі 13 трлн теңгені құрайды.

Күтілім бойынша, 2030 жылға қарай сумен жабдықтау желілерінің тозу деңгейі 33 пайызға, ал су бұру желілерінің тозуы 41 пайызға дейін төмендеуі тиіс.

Біз «Halyq сұрауы» айдарын жалғастырамыз. Министрлік жауабының толық мәтінін қысқартусыз ұсынамыз.

Сауал 2026 жылғы 24 ақпанда жолданған. Жауап 2026 жылғы 4 наурызда Қазақстан Республикасы Өнеркәсіп және құрылыс вице-министрі Қуандық Көкеновтен келіп түсті. Ал ведомство басшысы — Өнеркәсіп және құрылыс министрі Ерсайын Нағаспаев.