Фото:ЖИ

Қазақстанда 2026–2027 жылдардағы жылыту маусымына дайындық басталды. Электр станцияларын жөндеуге 384 миллиард теңге бөлінді. Бұл өткен жылмен салыстырғанда 9 пайызға көп. Бұл туралы Үкіметте мәлім болды.

Қазіргі таңда тәуекелі жоғары, яғни «қызыл аймақта» бес энергетикалық нысан қалып отыр. Олар: Семей жылу электр орталығы (облыс әкімі – Берік Уәли), Орал жылу электр орталығы (облыс әкімі – Нариман Төреғалиев), Тараз жылу электр орталығы (облыс әкімі – Ербол Қарашөкеев), Ақтау ЖЭО-2 (облыс әкімі – Нұрдәулет Қилыбай) және Теміртау ГРЭС-1 (облыс әкімі – Ермағанбет Бөлекпаев). Жыл соңына дейін электр станцияларындағы жабдықтардың орташа тозу деңгейін 52 пайызға дейін төмендету жоспарланып отыр.

Биыл тоғыз энергия блогына, 55 қазандыққа және 51 турбинаға күрделі жөндеу жүргізу көзделген. Қазіргі уақытта екі энергия блогы, 13 қазандық және сегіз турбина толық жөнделіп, пайдалануға дайын.

Қоймаларда 3,5 миллион тонна көмір мен 143 мың тонна мазут қоры жинақталған.

Еліміздің солтүстік және шығыс өңірлеріндегі негізгі жөндеу жұмыстары 15 қыркүйекке дейін, ал оңтүстік пен батыс өңірлерінде қыркүйек айының соңына дейін аяқталады деп жоспарланған.

15 тамыздан бастап арнайы штаб көмір жеткізілімін, бағаны және жасанды тапшылықтың туындауына жол бермеу жұмыстарын бақылауға алады.