Фото: gov.kz

Қазақстанда жанар-жағармайдың заңсыз шығарылуына жол бермеу үшін көрші елдерден кіретін көліктерге жаңа шектеу енгізілді. Енді жеңіл және жүк көліктері мемлекеттік шекарадан тәулігіне бір реттен артық өте алмайды. Бұл туралы Энергетика вице-министрі Қайырхан Тұтқышбаев мәлімдеді.

Оның айтуынша, елімізде жанар-жағармай тапшылығы жоқ. Алайда соңғы уақытта кейбір азаматтар көліктеріне қосымша жанармай бактарын орнатып, отынды заңсыз түрде шетелге шығаруға әрекеттеніп жүр.

«Қазір біз жанар-жағармайдың заңсыз әкетілуімен күресіп жатырмыз. Кейбір адамдар көліктеріне қосымша бак орнатып, отынды "сұр" жолмен сыртқа шығаруда», – деді вице-министр.

Қайырхан Тұтқышбаевтың айтуынша, соңғы кезде Батыс Қазақстан, Ақтөбе, Павлодар облыстарында және шекара маңындағы өңірлерде жанар-жағармай тұтыну көлемі күрт артқан.

Сонымен қатар Қырғызстан Қазақстаннан бензин жеткізу мәселесін қарастыруды сұраған. Вице-министрдің сөзінше, бұл мәселе елдің ұлттық мүддесі мен ішкі нарықтағы жанар-жағармай теңгерімі ескеріле отырып шешіледі.

Ол сондай-ақ Қазақстаннан Қырғызстанға жанармай жеткізілген жағдайда да бұл ішкі нарықтағы бағаға әсер етпейтінін айтты.