Қаланың жол инфрақұрылымын дамыту басқармасы Тілендиев пен Райымбек батыр көшелерінің қиылысындағы аялдаманың жай-күйіне қатысты пікір білдірді.

Бұған дейін Алматы тұрғындары қаладағы аялдамалардың бірінде асфальттың жоқтығына шағымданған еді. Соның салдарынан адамдар қарбалас уақытта қоғамдық көлікті лай кешіп, батпақтың ішінде тұрып күтуге мәжбүр болған. Редакциямыз бұл мәселе бойынша мемлекеттік органға ресми сұрау жолдады.

Шенеуніктер аталған аумақта асфальт жабыны бар екенін мәлімдеді. Олардың айтуынша, бұл учаскені күтіп-ұстауға аудан әкімдігі жауапты.

Сондай-ақ бөлім өкілдері Райымбек батыр даңғылы бойында BRT желісі салынып жатқандықтан, бұл аялдама кең платформаға көшірілетінін және қозғалысы шектеулі азаматтарға ыңғайлы етіп жабдықталатынын айтты. Нысанды тапсырудың болжамды мерзімі — 2026 жылдың қараша айының соңы.