Қазақстанда бірқатар маңызды кадрлық шешім қабылданды. Ерлан Қарин вице-президент қызметіне тағайындалды, Олжас Бектенов премьер-министр қызметін сақтап қалды. Ал Аида Балаева жаңа лауазым – Қауіпсіздік Кеңесі төрағасының орынбасары болды.

Құрылтай депутаттары дауыс беру барысында Ерлан Қариннің Қазақстан Республикасының вице-президенті лауазымына кандидатурасын қолдады. Сондай-ақ Олжас Бектеновтің премьер-министр лауазымына кандидатурасы қолдау тапты.

Осыдан кейін Мемлекет басшысы Қасым-Жомарт Тоқаев Ерлан Қаринді қабылдады. Президент вице-президент лауазымы Конституциямен бекітілгенін және оның мемлекеттік басқару жүйесінде ерекше маңызға ие екенін атап өтті.

Ерлан Қаринге мемлекеттік саясаттың негізгі мәселелері бойынша Құрылтаймен, Үкіметпен және басқа да мемлекеттік органдармен өзара іс-қимыл кезінде Мемлекет басшысының ұстанымын білдіру және қамтамасыз ету міндеті жүктелді.

Президент Олжас Бектеновті де қабылдап, жаңадан жасақталатын Үкіметтің алдағы кезеңдегі негізгі міндеттерін белгіледі. Премьер-министрге елдің әлеуметтік-экономикалық дамуына қатысты бірқатар нақты тапсырма берілді.

Қасым-Жомарт Тоқаев экономиканың тұрақты өсу қарқынын қамтамасыз етуге, мемлекеттік басқарудың тиімділігін арттыруға және халықтың әл-ауқатын жақсартуға басымдық беруді тапсырды. Сонымен қатар мемлекеттік органдардың үйлесімді жұмысын қамтамасыз етіп, орындаушылық тәртіпті күшейту қажеттігін атап өтті.

Тағы бір маңызды кадрлық шешім – Аида Балаеваның Қауіпсіздік Кеңесі төрағасының орынбасары қызметіне тағайындалуы. Бұл – мемлекеттік басқару жүйесіндегі жаңа лауазым.

Жаңа орган Президентке тікелей бағынады және есеп береді. Оның негізгі міндеттері ұлттық қауіпсіздықты қамтамасыз ету, заңдылық пен құқықтық тәртіп мәселелерін қамтиды.

Осылайша, Құрылтайдың алғашқы сессиясынан кейін елдің жоғары мемлекеттік басқару жүйесіндегі негізгі кадрлық тағайындаулар жасалды.