Сурет: baiterek.gov.kz

«Бәйтерек» ұлттық басқарушы холдингі Ұлттық инвестициялық холдинг болып қайта құрылғаннан кейін қызметкерлер саны мен топ-менеджментті қысқартпаған. Бұл туралы басқарма төрағасының бірінші орынбасары Нұрболат Айдапкелов мәлімдеді.

Оның айтуынша, трансформация аясында құрылған жаңа бөлімшелер ішкі резервтер есебінен жасақталған. Сондықтан қызметкерлердің жалпы саны өзгерген жоқ.

Сондай-ақ холдингтегі проблемалық жобалардың (NPL) үлесі орта есеппен 8%-дан аспайды. Нұрболат Айдапкелов мұндай жобалардың туындауына пандемия салдары, қуаңшылық және электр энергиясы құнының өсуі әсер еткенін айтты.

Айта кетейік, бұған дейін «Самұрық-Қазына» қорының ұлттық компанияларында әкімшілік персоналды оңтайландыру жұмыстары жүргізілген болатын. Бұл бастама Президенттің ұлттық компаниялардағы артық басқарушы кадрларды қысқарту жөніндегі сынынан кейін қолға алынған еді.