Фото: Алматы қаласының әкімдігі

Алматы қаласының орталығында тұрғын үйлердің қасбеттерін ауқымды жаңғырту жұмыстары жалғасуда. «Қасбеттен қасбетке дейін» абаттандыру бағдарламасы аясында тек Медеу ауданында 50 көппәтерлі тұрғын үйді ретке келтіру жоспарланған.

Q-Lab әлеуметтік жобалау бөлімінің жетекшісі Тимур Акатжановтың айтуынша, әрбір нысан үшін оның сәулеттік ерекшеліктері мен тарихи құндылығы ескеріліп, жеке жобалық шешімдер әзірленеді.

Тарихи және сәулеттік маңызы бар ғимараттарда бастапқы келбетін сақтай отырып, жөндеу-қалпына келтіру жұмыстары жүргізіледі. Атап айтқанда, сәндік элементтер қайта жаңғыртылып, қасбеттер сыланып, сырланады.

Мұндай тәсіл, мысалы, 1953 жылы салынған «Теміржолшылар үйіне» қолданылмақ. Ал минимализм стилінде салынған немесе сәулеттік айшықтылығын жоғалтқан үйлердің қасбеттері заманауи материалдармен жаңартылып, табиғи тас пен гранитпен қапталады.

Жобаны іске асыру қаланың орталық бөлігінің көркін жақсартып қана қоймай, тарихи мұраны сақтауға және Алматы тұрғындары мен қонақтары үшін жайлы қалалық орта қалыптастыруға мүмкіндік береді.