Алматыда қалалық сот ғимаратының құрылысы жалғасып жатыр. Бұл жоба іс жүзінде қаладағы ұзаққа созылған инфрақұрылымдық нысандардың біріне айналды.

Алматы қаласы Құрылыс басқармасы редакция сауалына берген жауабында қазіргі таңда құрылыс-монтаж жұмыстарының 50 пайыздан астамы орындалғанын хабарлады.

2022 жылғы жобалық-сметалық құжаттамаға сәйкес, жобаның жалпы құны 9,3 млрд теңгені құрайды. Бастапқыда республикалық бюджеттен қаржы тарту мүмкіндігі қарастырылғанымен, кейін құрылысты жергілікті бюджет есебінен аяқтау туралы шешім қабылданған.

Мерзімнің созылуы жобаны түзету жұмыстарымен түсіндірілді. Атап айтқанда, жаңа ғимаратта орналастырылатын судьялар құрамының саны көбейгендіктен, жобалық шешімдерді қайта қарауға тура келген. Бұл өз кезегінде құрылыс мерзіміне әсер еткен.

Қазіргі уақытта нысанды қаржыландыру мәселесі бойынша жұмыстар жалғасуда. Ғимаратты 2027 жылы пайдалануға беру жоспарланып отыр. Айта кетейік, нысанды бастапқыда 2019 жылы тапсыру көзделген еді.